Tantaran'ny vohitr'i Soamanandray. (lonjokely)

Tanàna iray ao avaratra atsinanan'Antananarivo, ao anatin'ny fari-piadidian'Andrianamboninolona no misy azy. 8 km miala eo amin'ny orinasa mpanao bodofotsy "Somacou" eo Ilafy, amin'ny làlana mankany Fiaferana.<br />
Andrefambohitra no anarana niantsoana azy taloha fa tamin'ny vanim-potoana faha-mpanjaka no nahatonga io anarana ankehitriny io.<br />
<br />
Tamin'izany fotoana izany, nisy manamboninahitra iray nantsoina hoe Rainitsizafy. Raha nanasa lamba i Soa, zanaka vavin'i Rainitsizafy, indray andro, ka hitan'i Ranjaka, Mpanjaka, izay nandalo teny, dia nentiny an-keriny ho eny an-dRova.<br />
<br />
Tezitra ity manamboninahitra raha nahita izany, nefa hoy ny Mpanjaka hoe : "Halaiko ho vady ny zanakao". Tsy nety anefa Rainitsizafy raha tsy anaovan'ny Mpanjaka trano ao am-bohitra, mitovy amin'ny eny Manjakamiadana, ny zanany.<br />
<br />
Dia nampanaovin-dRanjaka ny trano ary vita soa aman-tsara, ary mbola hita hatramin'izao tao Andrefambohitra.<br />
<br />
Raha tsy nanana Ray tokoa mantsy i Soa dia tsy nisy io trano io. Soa izy fa nanana ray ka dia izany no niantsoana ny tanàna hoe : SOAMANANDRAY.<br />
<br />
Raha vao hiteny ny finoana katolika ao Soamanandray dia tsy hay hadinoina i mompera Jean Beyzym, ilay pretra poloney nanitsaka tany voalohany satria nikarakara ireo marary hoditra tao Ambahivoraka sy ramatoa Ra-Cathérine, zanatany avy ao Soamanandray, mpianatry ry masera teny Andohalo.<br />
<br />
Nifandray i mompera sy Ra-Cathérine ka dia nanentana ny mponina hivavaka teny Ambahivoraka. Nataon'ny olona fihomehezana anefa izy ireo ka nolazainy fa mitaona ny olona hanatona ny habokàna.<br />
<br />
Ny 10 novambra 1897 no nanao lamesa voalohany tao Soamanandray i mompera Jean Beyzym, ka tao an-tranon'i Paul Rainizanany, taranak'i Rainitsizafy, no nanaovana izany. Nisy ireo olona nanatrika izany sorona masina voalohany izany nanome tany hanorenana ny fiangonan'i Soamanandray, dia i Rainiketamanga, tao amin'ny ilany avaratra, ary Ranialijaonina tao amin'ny ilany atsimo.<br />
<br />
Ny taona 1898 dia natao ny trano zozoro ary ny zoma 6 jiona 1898 no nitokanana azy ary nanaovana batemy voalohany an'i Rainizanany mivady sy olona hafa. Fetin'ny Fo Masin'i Jesoa io andro io ka izay nahatonga azy ho mpiaro ny Fiangonana.<br />
<br />
Noho ny fitsaboana ny boka izay nafindra any Maharana, dia natolotr'i mompera Beyzym ho an'ny fiangonana ny lakolosy sy dabilio 4 teny Ambahivoraka. Io no lakolosy izay mbola hita hatramizao ka nanaovan'ny tanora tongony biriky tamin'ny taona 1982.<br />
<br />
Nandroso ny asa ka notafoina taila izay nalaina tany Ambahivoraka ny fiangonana ary notokanana ny 4 jiona 1900. Ary nosoloina tafo fanitso indray kosa tamin'ny taona 1959.<br />
<br />
Ny lakroa izay misy eo am-pidirana ny tanàna dia fanomezana tamin'i mompera Guillaume, ny taona 1934 ary nohavaozina sy nolokoina ny 4 martsa 1991. Ny 23 jiona 2012 kosa no notokanana ny tsangambato fahatsiarovana an'i mompera Beyzym, izay natsangana eo anilan'ny lakroa.<br />