Tafapetraka ny vatofehizoro (TANIKETSA)

Tamin’ny fanamarihana ny faha roapolo taona nitandreman’ny Mpitandrina Ralambomahay Hendrininosy ny FJKM Andrainarivo Fahasoavana, ny taona 2011 no nanoloran’ny Fiangonana tany ho azy, teny Ambohimangakely.
Tamin’ny faha dimy amby roapolo taona maha Mpitandrina azy kosa (2013) no efa nikasan’ny Fiangonana hanome trano fonenana ho azy, ho fitsinjovana ny fisotroan-dronono. Notohizan’ny komitin’ny "Jobily Ny Fihavana tsika" izany, izay mikarakara ny fahatelopolo taonan’ny fiaraha-manompo sy fisotroan-dronono.
Niova ny terana hanorenana ny trano fonenan’ny Mpitandrina noho ny safidiny satria dia eny amin’ny Kaominina Bongatsara, fokontany Ambohibao indray no hananganana ny "Villa Fihavana tsika" araka ny nambaran’ny Mpitandrina Ralambomahay Hendrininosy tamin’ny fivorian’ny mpandray ny fanasan’ny Tompo ny Alahady 31 Oktobra 2021. Toerana izay an’ny fianakavian’ny Mpitandrina. Trano fonenana misy fanaka no hatsangana araky ny fanapahan-kevitra hatrany am-piandohana.

Vatofehizoro

Ny Sabotsy 4 Desambra 2021 no nametrahana ny vatofehizoron’ny tranon’ny Mpitandrina. Solotenan’ny Fiangonana ihany no nanatrika izany (noferana zato ny mandeha amin’ny fiara iombonana) izay notarihin’ny komitin’ny fanorenana sy ny Mpitandrina mianakavy. Teo koa ny Mpitandrina miza-draharaha Rakotomahefa Désiré izay nitondra ny tenin’Andriamanitra ka nampahatsiahiviny fa mampiseho ny maha izy azy an’Andriamanitra ny asan’ny Fiangonana toa izao satria mpanampy tandrify Izy no mpiaro azo antoka ary anton’ny zavatra rehetra.
Ny Filoha Mpanampy ny komity Rakoto Bruno Rodolphe no nitondra fanazavana mikasika ny tany izay efa vita  titre misoratra amin'ny Mpitandrina sy ny  permis de construire. Vita tao anatin’ny fotoana fohy noho ny fitondrana ambavaka nataon’ny Fiangonana. Ary nolazainy amin’ny maha Filohan’ny FILODIA azy fa ny fototra rehetra dia ataon’ny Loholona sy Diakona ho voninahitr’Andriamanitra.
Niaraka niredona ny hira "Jesoa vato fehizoro" ny rehetra sady nidina teny amin’ny toerana. "Amin’ny anaran’i Jesoa Kristy no anatsatohana izao angady izao", hoy ny Mpitandrina sady nitehaka ny rehetra.
Raha ny vinavinam-panorenana ny trano avy amin’ny Komity dia mahatratra 95 tapitrisa ariary.

Ezaky ny rehetra

Hatreto ny fitadiavam-bolan’ny komity Jobily Ny Fihavanantsika dia ny rakitra fahatelo sy ny lafibata avy amin’ny Sampana ary ny raki-pisaorana.
Nitondra fanentanana ny amin’ny fomba vaovao handraisan’ny rehetra anjara amin’ny fampidiram-bola ny komity ny Alahady 7 Novambra 2021. Misy ny "Ezaka Villa Fihavanantsika" izay karatra azon’ny sokajin’olona rehetra andraisana anjara dia ny lehilahy "Ray kiady", ny vehivavy "Reny mavitrika", ny tanora "misandratra" ary ny ankizy "Taniketsa". Natao hanehoana ny herim-pon-dehilahy sy ny sandrim-behivavy ary ny tanora tomady sy ankizy falifaly izany. Misy toerana voatokana handoavana adidy manomboka ny Oktobra 2021 ka hatramin’ny Desambra 2022 izany.