I Kiyoshi mpanao kiraro (Heriarilala Andriamamonjy)

I Kiyoshi mpanao kiraro

Indray andro, hono, nisy mpanao kiraro  antsoina hoe Kiyoshi. Nahantra tokoa i Kiyoshi, tsy mba nanana vola hividianana sakafo matsiro izy, fa zara raha mahazo tapa-mofo maina kely. Teo akaikin'ny tranon'i Kiyoshi anefa, nisy mpivarotra antsoina hoe Gaku. Mikarakara sy mivarotra trondro voasaly i Gaku.
Isan'andro, nankeny akaikin'ny tranon'i Gaku foana i Kiyoshi dia nipetraka teo akaikin'ny afo anasaliana ilay trondro. Tena natsiro ery ny fofony. Naka sary an-tsaina ery i Kiyoshi, toa tsy ireny mofo maina ireny no nohaniny  fa trondro mafilotra be. Tia vola loatra anefa i Gaku mpivarotra. Nahasosotra azy ny nankafizan'i Kiyoshi  ny fofon-trondrony. Noho izany, nanapa-kevitra ny haka vola tamin'ity mpanao kiraro mahantra izy. Dia niainga, hono, i Gaku nankany an-tranon'i Kiyoshi.
- Mila vola avy aminao aho, mandoa vola amiko ianao izao.
- Manahoana, Gakusan ! Fa inona no tokony haloako aminao ?
- Nankafy ny fofon-trondro nasaliko ianao. Omeo vola aho !

Dia lasa,hono, i Kiyoshi naka vilia baolina, nataony tao ny vola vy vitsivitsy dia nahontsakontsany tao.
- Izay ! Efa naloako taminao.
- Tamin'ny fomba ahoana ? Oviana ?
- Nefaiko ny vidin'ny fofon-trondronao tamin'ny alalan'ny feon'ny vola viko. Raha tsy ampy ilay teo dia mbola afaka manontsana indray aho.
Kepoka tsy nahateny i Gaku. Lasa izy niverina tanam-polo tany amin'ny fivarotany.
Tsy manam-be ny olo-mahantra fa ny tia ny vola kosa manana  kely noho izy.

Angano nandeha tamin'ny English Club T.V tamin'ny 22-06-26, nadikan'i Heriarilala Andriamamonjy tamin'ny teny malagasy.