Ny harendrinay mianaka (Heriarilala Andriamamonjy)

NY HARENDRINAY MIANAKA

Fetin’ny Malagasy, hono, ity volana ity. Telopolo andro natao hampifaliana ny ankizy, telopolo andro andro natao hanandratana ny tenin-drazana ary telopolo andro natao hankalazana ny fiverenan’ny Fahaleovantena. Mbola tsy nahazo kilalao  ny zanako. Ny mpivarotra amoron-dalana nefa amin’izany efa voaravaka harendrina maro loko, mahafinaritra ery ny mahita azy ireo mihantokantona eny amin’ny elobe eny. Eny amin’ny latabatra kosa rakotra kilalao sinoa, ao ny maneno, ao ny misy hazavana mipipika izay vita amin’ny plastika avokoa. Toa mahasarika olona kokoa ireo vitan’ny kely maso ireo miohatra amin’ireto asa tanana malagasy. Manaitra tokoa saingy tsy miteny manoloana ny fety malagasy. Tsy miteny ahoana ? Fa inona ilay ampitenenina ?
Voalohany, an’ny Malagasy ny fety. Ao anatin’izany fety izany tsy maintsy misy fandaniana atao. Ny fandaniana atao anefa mety hahavelona ny hafa, koa hamelona ihany ve tsy aleo ny iray ra amin’ny tena no velomina. Lasa ny hafa firenena indray no mifaly mioty ny volantsika, dia ry zareo izany no mifety ?
Faharoa, tsy ny hazavana mipipika loatra no inona, fa ny  hazavana  avy amin’ny AFO. Fa inona moa no hevitr’izany afo izany ? Natao handroahana ny fanahy ratsy ny afo, entina mihodidina ny tanàna iny amin’ny taombaovao malagasy fa entina manaraka ny arabe kosa rehefa 25 sy 26 Jona. Inoan’ny Malagasy izany heriny izany afo izany.
Ankoatra izay, hafanana ny afo sady fahavelomana. « Ny tany misy afo, misy olona », tandindon’ny fahavelomantsika Malagasy ny afo ary ny velona no mifaly, ny velona koa no misy hafanana.
Mety hoheverin’ny olona sasany fa tsy mahara-pivoarana ny ray aman-drenin’ireny ankizy mbola mitondra harendrina taratasy ireny. Mety hisy halaim-panahy koa hisaina fa tsy manam-bola irony mitondra jiro kapoaka sy mandrehitra bozaka irony. Tsia, ireny no tena hafaliana malagasy, ary ny afon’izy ireny no tena maneho ilay aina sy fahavelomana ao anatin’ny Malagasy.
Tadidiko fa hatramin’ny nidiran’ireo kilalao vita sinoa ireo teto dia tsy nisy intsony ny ankizy miredona ny hoe : « Harendrina ôôô ! » Kanefa mbola hafaliana tsy manam-paharoa koa no otazana ao anatin’izany fiaraha-miredona izany. Tapaka ny hevitro, harendrina taratasy no hovidiko an’ny zanako fa velona izy, velona ny fireneko, hifamelona izaho sy ny mpiray tanindrazana amiko. Izahay mianaka no hiaraka handroaka ny fanahy tsy manjary eto amin’ity Madagasikara ity.

Heriarilala 23/06/23 04 :30