NOFY (Ny Andri-Fara)

« N O F Y »

Malomaloka antoandro ny lanitry Madagasikara na dia teto Iarivo izay renivohiny aza no niantombohan’ny ady saritaka dia nahenika azy ny alahelo.Izay rehetra tazanina na tsinjovina dia ankona tsy ahitana teny firy…,nahoana loatra re !Indrisy mantsy fa nandeha ila ihany izany vetsovetson’ny natiora izany noho ny fisian’ny tabataba eran’ny tanàna.Fa inona marina no zava-niseho ?!
Nikomy ny olona, leon’ny fanaovana ampihimamba ny toe-karena sy ny tsy fanajana ny lalàna fototra nitondrana ny ny Firenena.Vahoaka marobe tsy hita isa no nirohotra ho eny amin’ny kianjan’ny 13 May, mba hitady fanovana sy handrodana ny mpanao didy kofehy lehibe.Tao anatin’ireo vahoaka ireo no nandrenesako tanora vitsivitsy niady hevitra raha mbola nifandresy lahatra teo amin’ny seha-dampihazo ny mpanentana sy ny vahoaka entanina.
- Raha amiko manokana hoy ity tovovavy iray mantsy ilay namany teo anilany : « Mila miady isika raha te-hanatratra ny tanjona ? »
- Tsotra izany hoy ilay anankiray nifanila taminy :  «  Mila manana tanjona iray goavana isika dia ny sori-dàlan-dehiben’ny tolona entim-bahoaka miady amin’ny fahantrana sy hanoherana ny tsy rariny dia ireo mpangoron-karena sy mpanao ampihimamba, ilaina noho izany ny fahombiazan’ny tolona mba hiankina be dia be amin’ny ambaratongan’ny fiaraha-miasan’ny hery rehetra tena demokratika sy ny fihetseham-panafaham-pirenena ary ny fandrosoana eo amin’ny lafiny sosialy. »
- Fa angaha izany ihany hoy ilay tovolahy nihaino resaka : «  Ilaina dia ilaina ny famongorana ny kilasin’ny mpifanohitra mba hampijoroana ny fiaraha-monina amin’ny olona tsy misy kilasy, mateza ary hahazoan’ny valalabemandry mampivelatra ny lafim-piainana rehetra ary ny toetra maha olona dia ny saina sy ny fanahy. »
Indro tovolahy iray, tanora fanahy loatra, maitso volo, raha jerena ety ivelany dia miavaka amin’ny tanora indray  nihira tamin’ny satria nampitovy kilasy amin’ny toe-panahin’ny vahiny na ny fomba fitainy izany indrindra fa ny fomba fihaingony ; nanatona ireto namany izy ary mba nilaza izato heviny :
- « Lavitra izany tanjona izany raha amin’izao fitondrana jadon’ny mpangoron-karena izao, mbola ezaka be ny tolona…,manaiky anefa aho, na ho ela na ho haingana ; tsy maintsy mijoro ary vonona sy hiaro ny tombontsoa iombonana.Mila mandroso isika ary tsy vitan’izany fa ny fandresen’io firaisana io no hampijoro sy hampisy hery ny tanjaky ny vahoaka sahirana mila fanovana mba…
Marina izany hoy ilay tovovavy niteny tery aloha :
- « Mampiorina ny  antoka ho an’ny fanovana ny tolom-panoherana ny mpangoron-karena satria tolona ho amin’ny fanovana ny fototry ny firaisankina sy ny fanoherana ny tsindrihazolena.Tandremo anefa, fa anankiray tsy hisian’ny fahombiazana ny famadihana ny tolona… » . Niandry el izay vao nanohy ny teniny, isika ity varian-dresaka fotsiny fa mba iza avy ny anaranareo telo mianadahy mba hifakafantarantsika, mbola ho lava mantsy ny hifakazarantsika eto ka tsy aleo…,fa ny ahy aloha dia i Fanja no hiantsoana ahy.
- Antsoy fotsiny hoe Jaona aho hoy ilay tovolahy niavaka tamin’ireto namany, izay voatantara tery aloha
- Izaho kosa no Mialitiana
- Rivo dia ampy, hoy ilay tovolahy iray somary niataka kely, raha ny fahitako azy toa saro-kenatra be ity izy.Rivosoa mantsy no tena anarako e !
Tamin’izany no nangina tampoka ny vahoaka, toa nangila tsofina nihaino izay nambaran’ilay mpandaha-teny.Fa inona no nolazainy teo hoy i Mialy. Nifampijery izy telo mianadahy no namaly azy i fanja :
- « Tafahoatra hoy izy ny tsy fanajana ireo fahalalana fototra eto amin’ny Firenentsika ankehitriny, voahosihosy ny demokrasia ; noho izany dia potika tanteraka ny zo maha

- 1 -


Olona ary tsy voahaja intsony ny hasina maha malagasy…, ka tsy ekena ny jadona, ny fanaparam-pahefana, ny famoretana tsy ahafahana maneho hevitra , ny fampirohorohoana amin’ny endrika rehetra.Aoka isika hijoro ho tena lehilahy sy vehivavy ary tanora ho andrin’ny Firenena.Masina ny tanindrazana.
- Ka inona ary no andrasantsika hoy i Mialy nanohina an’i Fanja.
Indreo ny vahoaka fa mivoivoy ny hevitra vao noresahana teo.Inona no tapaka ary inona no tokony hatao.Indreo ny vahoaka fa samy namonjy ny fodiany avy noho ny fahataperan’ny fotoana… ; rahampitso indray tohizana ary mba lasa nizotra nanaraka an’ilay kihon-dàlana manamorona ny zaridaina  izy efatra mianadahy.Nitohy ny dia…,nitohy ny resaka nataony…, dia mbola reko ihany noho ny rivotra nitsoka taty amiko.
- Loharanom-pahalalana kokoa ankoatry ny fihariana ny fandalana ny marina  hoy i Fanja nanohy ny resaka nataony.Tsy asiana ady hevitra be ny amin’io fa mba eritrereto fotsiny izany olona mandala mafy ny marina ka variana miandrandra mandinika ny lanitra, nefa tsy mihinana ; tsy mitafy ; tsy manan-trano hialofana, tsy maintsy manokatra ambim-bava ny mpiara-belona izay vao afaka handala ny marina ny olona anankiray manao fikarohana na iza na iza izy.Tsy mandala ny marina ny  olona raha tsy  velona aloha…,ary velona hamonjy ny Fireneny.
- Ary ny adin-tsaranga ? somary hendratra  Rivosoa nanontany : «  Ilaina ny mandala ny marina saingy toa mbola nosafosafoina fotsiny sa natokana ho an’ny Mpino kristiana angamba ».
- Betsaka ny fahalalana vaovao mahazo laka any amin’ny vahoaka hoy i Jaona tsy taitra,indrindra ny anadihadiana ny fiainam-bahoaka rehefa niha-mafy ny adin-tsaranga nataon’ireo tia tanindrazana malagasy mba handresena ny amperialista nandritra ny fanjanahantany sy ny talohan’ny taona 1972, eny fa na dia hatramin’izao aza…, mbola miady foana.Manaiky aho fa  nanafaingana ny fivoaran’ny adin-tsaranga ataon’ny saranga voageja tsy voatsetsitra niady fahefana izao tolona izao.
- Taitra i Fanja ka  tsy sahy namboraka ny tao am-pony fa naneho hoe : « Ahoana ary ny hevitrao ? »
Tsy namaly avy hatrany anefa i Jaona fa notsaingohin’i Mialy ka hoy izy :
- « Mampitarazoka ny fivoaran’ny fahalalana kosa ny adin-tsaranga ataon’ny saranga mpitsetsitra nahazo fanjakana ka.Iza tamin’ireo mpitondra teto ireo moa no mba nitsinjo ny vahoaka rehefa nahazo fanjakana ka…, mba lazao hoe !
- Marina aloha izany hoy i Fanja, somary nikohaka fa  jenjin’ny setroka hafahafa tany ho any nifafy tany aminy.Kanefa ! tsy azo sakanana fa tsy maintsy mitarika amin’ny revolisiona ny  di-dohan’ireo mpanao politika ka na tiana na tsy tiana tsy maintsy hirefotra ihany  ny vanja.
Inona moa ny vanja amintsika…, miteny ho azy anie izany e ! fahantrana ve tsy mira na manome hanohanana.
Tsy naharitra aho fa nanatona ireto tanora ireto, tiako ny edialiny te hanova tokoa ny Firenena ao anatin’izao kizom-pahantrana lalina izao ka nanokon-dresaka tamin’izy ireo aho :
- Eny hoy ho… tsy laviko, ho foana tsikelikely ny fahasamihafana na eo amin’ny lafiny sosialy na eo amin’ny politika  fa indrindra indrindra  eo amin’ny lafin’ny kilasy raha toa ka vonona amin’ny fotoana mandritra ny fanatsarana tiana  hampiharina ny vahoaka ary izany dia midika ho fizoran’ny fifanakaikezana hatrany ary feno tokoa  io sokajy sosialy io sy ny kilasin’ny fiaraha-monina, ka hiravona ny elanelana amin’ny kilasin’ny mpiasa ambany sy ny mpiasa ambony mba tsy hilazako hoe :  « Avara-pianarana»
- Azafady hoy Rivo tamiko : «  Raha azoko tsara izany dia ny firaisan’ireo sokajy voatanisanao tery aloha ireo no hanamafy orina ilay fiaraha-monina  vaovao tiana hajoro io »
- « Eny ! Io no hiteraka tanjona iray handravona ny disadisam-politika misy ankehitriny ka mety hanafoana ny fitadiavan-tseza, satria iny sori-dàlana iny no mampifandray ka manafoana tanteraka ny elanelana misy eo amin’ny adin’ny sosialy sy ny toe-karena azy ny koltoraly mba hikojakojana izay anadavanandrom-piainan’ny olona na ety ambanivohitra na any an-tanan-dehibe aza…, vokatra izany hoy aho nanohy ny  fanehoan-kevitro dia hiara hiasa ireo

- 2 -

Ka hiteraka angovo anankiray dia ny fandresena satria handray anjara lehibe amin’izany fizorana ho amin’ny fanatsarana ny tena demokrasia izany ireo sokajin’olona nihatahana.Ka hiditra ao amin’ny fitantanana ny raharaham-panjakana na koa ho ao amin’ny sehatra miahy ny resaka sosialy fotsiny…,mila foanana ny fahasamihafana eo amin’ny samy olona dia ho mafy orina ilay fampandrosoana tiana hajoro.
Somary niondrika i Mialy namaly izany : « Ny fiaraha-monina tsy misy raorao mantsy dia midika fa ; fialana amin’ny ady sy izay rehetra mampifaditra na mampifanolana eo amin’ny fanjakana sy ny vahoaka.Ny fitovian-tsaranga sy ny zo hananan’ny tsirairay ary ny fanajana ny fiandrianam-pirenena, ny fampiroboroboana ny fiaraha-miasa ara-toe-karena indrindra indrindra sy ny maha iray ny kolontsaina izay voafehin’ny fitoviana amin’ny tombony ifanakalozana… »
Tsinjonay ery anoloana ny tsangambato iray lehibe manerinerina ka mora tazan’ny mpandalo, natao ho an’ireo mahery fon’ny Firenena izay tsy nikely aina tsy nitandrio hasasarana fa maty ho an’ny tanindrazana iombonana ity.Nibanjina azy izahay dimy mianadahy, nanjary sampanan-dàlana iray nifandaozanay teo dia samy namonjy fodiana izahay.
Nony nifoha aho ny maraina, dia niverina tao an-tsaiko avy hatrany ireo eritreritra nanjohy ahy ny omalin’iny sy ny fikasana tiako ho tanterahana tao anaty nofy. Vao  avy nandona tao am-baravarany Rivo, tara-pahazavana mivolo-batolalaka ka nampiseho azy ny efiny amin’ny endriny fahitany azy andavanandro.
- « Amin’ny fomba ahoana moa, hono no tokony hiovan’ny fiainany, nefa tsy miova izao rehetra  manodidina azy izao ?
Indro Rivo, niarahaba  ahy.Somary gaga aho satria tampoka tsy nampoiziko ilay izy. Kisendrasendra no nihaonanay teny Analakely.
Dia nizotra nandeha ihany izahay roa , izy moa nisiotsioka falifaly toa nanantena zavatra hafa ;izaho kosa lasa eritreritra ny amin’izay ho avin’ny Madagasikara miady amin’ny fanilihana ny  tsy  matimanota.Nangala-pijery aho nandinika an-dRivo mandimandina ery izato endriny tsara dia tsara , henjana ny tenany manontolo ka raha dinihana indray mitopi-maso dia nofosana tokoa ny lehilahy.Tsara tarehy sy bikana…,lehilahy mahery ary vonona hisedra ny mafy.
- Rivo hoy aho : «  Ampio aho hanarina ny firenentsika latsaka an-katerena ? »
- Fantatrao ve ry Tantely, fa enjehin’ny rariny izay heveriny ho izy no voatendry hampanjaka azy, ary  toa tsy voaavany firy intsony izany  amin’ny hevitr’izy tenany fa enjehin’ny toe-javatra ateraky ny fiarovana izany rariny izany.Sahala amin’ny mpitondra fanjakana enjehin’ireo mpitrongy vao homana na enjehin’ny fitiavam-boninahitra…Hanampy anao aho.
Adiny dimy izay no lasa.Nipoka ny ady, velona ny fifanjevoana, nirehitra izay noheverina ho tombontsoan’ny  mpitondra nanao ampihimamba ny toe-karena, raha ny marina dia niniana nodorana rehefa avy norobain’ireo vahoaka noana sy sahirana.Rava tao anatin’ny fotoana vitsy monja ireo nohariana nandritra ny fotoana ela dia ela ary tena naharitra tokoa.Ripaka avokoa rehefa toeram-pivarotana na izy an’ny malagasy na izy an’ny vahiny monina sy  nitoetra teto Madagasikara., nandrika ny rà, teo ny may kila forehitra ary lasa lavenona ny fananana..Rakotra haizina ny lanitr’Antananarivo.Nampalahelo satria nifono halatra sy fandrobana ilay tolona natao. Fanontaniana nipetraka dia hoe : « Maty ho an’iza ireny olona ireny ? » noho ny fahantrana sa tena fitadiavana fanovana !Tsy fantatro, ny hany tsapako dia izao : «  Mahantra aho…, mahantra ny 90 isan-jaton’ny malagasy »
Vita ny tolona saingy mbola lavitra ny ezaka , nahoana hoy  ianao.Tsotra ny antony.Mbola ao andamosin’ny tanora ireo mpanao politika efa naloan’ny vahoaka, ireo izay nilaza fa tena tia tanindrazana ka na izy nanjary mpanohana ny fitondrana na izy nivadika mpanohitra.Mba fantatrao moa fa tsy nisy teto na dia iray aza nolazaina fa ny vahoaka no nitarika ny  fanovana, Tsy marina izany. Satria rehefa tsy nahazo toerana ilay mpanao politika fata-daza na koa ny antokony dia nivadika izy ireo ka lasa miantso ny vahoaka hikomy hanohitra fanjakana ary hidina an-dàlambe dia miafara hatrany amin’ny fanonganana.

-3 -
Azon’izy ireo ny toerana dia miverina ny fomba fanaon’ny teo aloha ihany.  Izy ireo ihany koa  no miezaka mandoto rano sy manakorotana ka raha tiany hajoro dia mijoro, tian’ny hazera tsy maintsy mirodana.Mahagaga o !.Iza hoy anao no mizaka izany.Iza ! ny malagasy tsy mihinana afa tsy tapa-kibo, homana ny tsy fihinana ary  mitafy izay tsy tiany.Eny, mianoka ao anatin’ny trano tsy zarizary sy mitafo lanitra.
Tsaroako tsara ny kabarin’ny Filohan’ny Nosy  tamin’ny taona 1975 tany ho any  manao hoe :      «  Ho anareo vahoaka Malagasy kosa, tiako ny manao antso avo ho anareo sy mangataka anareo ho mailo mandrakariva eo anatrehan’ny tetik’ireo izay mety hampirisika ny ady an-trano sy hanimba ny firaisam-pirenena. Aoka isika na avy aiza fiaviana na avy aiza hiambina toy ny anankandriamaso izany harena sarobidy izany ka tsy ho azon’ireo olom-bitsy hahodikodina amin’ny fanavakavahana ara-poko tsy ahitam-bokatra fa fiasana nataon’ireo mpanjanatany hizarana antsika Malagasy .» Koa inona ary no vahaolana raha hitondra an’i Madagasika ho an’ny Nofinofy isika :      Mampiavaka indrindra an’izao  vanin’andro iainantsika ankehitriny izao ny fotoana ny teteza-mita; tsy fantatra hoe: “ Teteza-mita ”, mankaiza sy mitondra inona no tadiavina hajoro sy haorina eto amintsika. Asa! Fiampitana amin’ny sosialista mankany amin’ny kapitalista angamba. Tsy hay! Tsy mbola niezaka toy izao ny ankolafin-kery politika, hanatratra tanjona iray, manerana an’izao Tontolo izao io fivoarana io. Raha izany no heverina dia dingana sarotra indrindra ary isan’izay henjana ny rafitra teteza-mita; tamin-kery lehibe tokoa mantsy no nilofosan’ny tany tsirairay, taorian’ny fandresen’ny revolisiona sosialista ary tena nanafaingana ny fandrosoana eo amin’ny ara-toe-karena, ara-tsosialy sy ara-politika, saingy tsy mba toy izany ny teto Madagasikara, fa rivo-politika izay mifanohitra amin’ny foto-pisainana sosialisma no natao. Mbola nanjaka ny mpanohariana Kapitalista sy ny Imperialisma, izay  fetra faran-tampon’ny kapitalisma, ankatokin’ny revolisiona sosialista sarin-tsariny. Tsy hita teto ilay tena lalàna fototra ekonomika mifototra amin’ny sosialisma, ny lalànan’ny fampandrosoana araka ny teti-pivoarana sady mirindra, ny fifanarahan’ny fifandraisam-pamokarana araka izay tanjona tratrany. Eo amin’ny fitsinjarana arakaraka ny asa, hany ka mbola fatoran’ny hoe: “ Tany an-dalam-pandrosoana ”, izay politika efa lany andro entina hanatsarotsaronana ny politika efa tsy nety intsony fa mbola ankafizin’ny mpitondra ankehitriny, sitrany ahay e! aiza koa, misy ireo Firenena mahaleotena, tratra aoriana raha mitaha amin’ireo namany Firenena Kapitalista na Sosialista eo amin’ny lafiny fivoarana ara-tsosialy sy ekonomika, noho ny faharetan’ny fitsetsefan’ny mpitondra olom-bitsy natao tamin’ny Firenena Malagasy . Isika dia nizotra ho amin’ny lalam-pivoarana sosialista saingy natanjaka ny Imperialista teto.
Inona ary no lanjan’izany hoe, fitondram-panjakana eo am-pelatanan’ny kilasin’ny mpiasa hanatanteraka ny teteza-mita mankamin’ny tena sosialisma izany ?
Endri-pitondrana vaovao , ara-poto-kevitra ny fitondrana misy izay azo ambara ho “ Proletariat ”. Tany amin’ireo fiforonana sosialy talohan’ny niforonan’ny sosialista kanefa mihatra amin’izao taona arivo fahatelo izao. Ny fitaovam-panjakana no fitaovana mahomby ampiasaina ho amin’ny fiarovana ny tombontsoan’olom-bitsy, izay vitsy an’isa raha mitaha amin’ny vahoaka, fitaovana ihany koa ho fanapepoana ny maro an’isa voatsetsitra. Hafa noho ny zava-niseho hatramin’izay no niseho ankehitriny, arakaraka izany ny fanjakana sosialista raha ny tena izy, dia fitaovana fanapepoana ny mpitsetsitra, izay tena vitsy an’isa eo amin’ny fiaraha-monina.
Tsy midika anefa izany fa tsy maintsy endrika famoretana foana ny tolona fanoherana ny Borzoa. Tsia! Raha mbola azo atao koa dia fitaizana ny Borzoa no ataon’ny Governemanta sosialista, fitarihana azy ireo, hiasa hamokatra izay zavatra ilain’ny fiaraha-monina, handray anjara amin’ny fanorenana ny tena sosialista marina. Ialina ireo Borzoa  manam-pahaizana manokana eo amin’ny lafiny toe-karena, fanabeazana, fahasalamana mba entina hampandrosoana ny Firenena.
Tsy mbola tena fanorenana ny sosialisma ny fanamafisana ny fitondram-panjakana nisy teto hatramin’izay satria mbola any am-pelatanan’ny kilasin’ny mpanana ny familiana mibaiko ny toe-karena, mbola  tany amin’ireo mpitondra teo aloha ny drafitra maty paika amin’izay fomba hitantanana ny Firenena..

- 4-
Mbola ao anatin’ny Kapitalista ny Orinasa sasany ary ireo mijoro sy mandeha dia iniana potehina ka amidy mora ary miverina any aminy indray ka ny mpanam-bola no mahazo tombony.
         Indreo misy endrika fototra sy fomba fandraisana ho fanam-pirenena:
- Fandraisana fananana an-keriny tsy misy tambiny, izany hoe, fanalana ireo fitaovam-pamokarana tsy ho eo  am-pelatanan’ny kilasin’ny mpitsetsitra.
- Fividianana tsikelikely ireo fitaovam-pamokarana ka ny ampahany ihany na ny rehetra amin’ny fitaovana noraisina ho fananam-pirenena no aloa amin’izay tompony.
- Fanovana tsikelikely ireo fitaovam-pamokarana kapitalista ho sosialista amin’ny alalan’ny fampiharana endrika samihafan’ny kapitalisma an’ny Fanjakana.
Aiza anefa isika izay tsy nanana afa-tsy 7,4 %, monja. Raha nizotra amin’ny tena izy marina ny revolisiona sosialista tamin’ny taona  1975, dia ho nandalo dingana maro ny fandraisana ny fananam-pirenena. Saingy, tsy izany no zava-nisy, aiza izany ankehitriny raha ny fividianana Orinasa amin’ny tompony teo aloha no jerena amin’ny saina tsy miangatra. Nankaiza avokoa ireo Orinasa tsy vahiny novidian’ny Repoblika malagasy ny taona 1959, ka hatramin’ny taona  1972. Ary aiza ihany koa ireo Orinasa Sosialista ?
Ireo anefa no karazana koperativa najoro nandritra ny revolisiona sosialista Malagasy, nandritra ny  14  Taona mahery (  1975-1989 ) Koperativa izay iombonana ny fitaovam-pamokarana sy ny asan’ny tantsaha, fa tsy ny tany. Hiaraka manao ny asa any an-tsaha amin’ny koperativa sahala amin’itony, ka ny tatsaha no mandray ny vokatra:. Koperativa izay hanambarana ny ny fitaovam-pamokarana rehetra, hatramin’ny tany. Eto dia mizara amin’ny tantsaha arakaraka ny anjara narotsany ny Fanjakana.
. Koperativa hamokarana iombonana ka ny tany sy ny fitaovam-pamokarana ary zaraina amin’ny mpikambana ny vokatra araka ny asa vitany.
. Koperativa izay mampindrana ny tany na ny fitaovam-pamokarana ka ny ampahany arakaraka izay hifanarahana no aloa. Io no ampiasaina eto amintsika raha toa ka olom-bitsy no mampiasa iretsy aloha.
Lalana lavitra ny fanorenana sosialista tena izy fa tsy sarin-tsariny. Mbola zana-tohotra no dingana maro mifanesy no ho lalovany. Mifandraika  amin’izany ny fanovana toe-tsaina raha tiana ny ahomby amin’ny fanavaozana ka mila fahombiazana.
Endrika lehibe telo mantsy no hitondrana ny tolona manoloana ny kapitalista: Ekonomika, Politika, Ideolojika.
- Ny Tolona ekonomika mantsy no endrika iray ara-tantara voalohany ny adin’ny kilasy. Manomboka eo ny fiarovana ny tombontsoa ara-toe-karena iankinan’ny fiainana isan’andro, dia ny fisondrotan’ny karama manoloana ny fiakaran’ny vidim-piainana.
- Ny Tolona politika dia fanafahana ara-tsosialy, famongorana ny rafi-pitsetsefana kapitalista sy ny mpanohariana, fahazoana ny zo sy ny fahalalalahana demokratika ary fampanjakana ny fandriampahalemana izay azo atao tsara raha tsy misy olona ambony mpanakan-tsakana amin’izany noho ny fihinanana an-jambany sy ny tamba-jotran’ny dahalo ambony latabatra sy ny kolikoly, izay mampitsingevana ny fahaleovan-tenam-pirenena.    
- Raha tiana indray anefa ny hidirana amin’ny fonja-kevitra Ideolojika dia ilaina ny fampiharana ny baikom-pitolomana iray hita fa mampivoatra fa tsy mamarina an-kady, ka tolona ideolojika tsy omby tratra no atao miaraka.
Raha tiana ny hahazoana ny fahombiazana dia ilaina ny fanavaozana ny revolisiona mahery vaika ho amin’ny fampandrosoana, hangalana ny fahefana sy ny fananam-pirenena amin’ireo olom-bisty na ny firodanan’ny fanjanahan-tany izay noheverina fa tena zava-dehibe dia nivaona tamin’ny tokony ho izy.
Ny Vanim-potoanan’ny tolon’ny hery velona raha nisy izany tamin’ny 1972-1991-2002, 2007 dia nanjary namela takaitra fa ny omaly tsy niova ihany. Ajoro ny rafitra fa tsy mahalala ny vahoaka:
-. Raha misy ny Fivondronam-pokontany atao inona ny “ Commune ”
-. Ny Firaisam-pokontany mitaha amin’ny “ Arrondissement ”


-5 -
-. Ny Fokontany manoloana ny “ Quartier ” na ny “ Village ”
-. Ny Faritany manoloana ny “ Province Autonome ”
Nahoana no mbola misy sy mihatra foana ny P. D. S  na ny “ President Delegation Special ” no mamaritra an’ireo tsy misy mpitantana na apetraka hitantana. Ahoana ny amin’ny Faritra sy ny Vakim-paritra na ny “ Region ” sy ny “ Departement ”. Inona no tena nandraikitry ny “ Prefet de Police ” mitaha amin’ny “ Maire ” sy ny «  Delegué Arrondissement ». “ Miasa ve ny Prefet sy ny Sous Prefet ”. Mifangaro voraka ny solon-tenam-panjakana sy ny an’ny vahoaka. Iza no tena marina sa izay ilay fitsinjaram-pahefana ?
Lenine, Filohan’ny Firaisana sovietika teo aloha dia naneho fa:  “ Miitatra ny revolisiona  araka ny filazany, rehefa tsapan’ny olona am-polon’ny tapitrisa fa tanty intsony ny mitohy miaina anatin’ny fepetra toy izao ”, izany no tsy maha mety ny “ Fanandramana revolisiona ”, satria tsy mitovy ny olana eo amin’ny Firenena na dia manan-jo hanao izany aza.
Tsy laviko kosa anefa fa ilaina ny toe-draharaha revolisionera mba hanatanterahana, tsy ny fanovana tena sosialista ihany no ekena ho baikom-pitolomana fa ny mety revolisiona ara-tsosialy ihany koa. Tena manana ny lanjany manokana mantsy ny toe-draharaha revolisionera rehetra mba hitondra fandresena.
Mila mailo anefa satria maro ny mpanohariana mety hitondra any amin’ny fiokoana, sabotazy, fanodikodinan-tsaina, fanentanana hanohitra ny Fanjakana sahaniny. Koa sahia ry Malagasy liam-pivoarana! Raiso ny andraikitra. Ampy izay fa andao hanambatra ny hery, tandiavo ilay hery hampiray  antsika.
Tsarovy! Fa tadiavin’ireo olom-bitsy amidy varo-boba amin’ny Sinoa sy ny Karana ary ny Arabo ny tanintsika. Tsy azo ekena izany. Isika no tompon’ity tany ity ary foin’Andriamanitra hitoetra teto isika sy ny taranantsika. Efa betsaka izay rà latsaka izay izay namoto ny tany fa ninia nanampin-tsofina ny Mpitondra. Koa sahia hiady ho an’ny Taranaka.
Ny Malagasy leom-pahoriana, dia haneho fihetsiketsehana demokratika, hanoherana ny fanjakazakan’olom-bitsy mitady hangoron-karena. Tsy maintsy mitolona ny Tantsaha hanohitra ny mpitsetsitra. Tsy maintsy hitolona isika, ianao, izaho, ianareo mba hiarovantsika ny tanindrazana iombonana, hitandroana ny fiandrianam-pirenena ho amin’ny tena demokratika marina. Mila arovana ny sata maha Firenena antsika, ny maha olombelona ary ny fiarovana ny maha Repoblika tsy mivaky an’ny Malagasy . Hiady ny fanatontoloana tsy manjary fa tsy ilaina izay, indrindra ny fivelaran’ny ireo mpizahantany mpanao firaisana ara-nofo, ny fanatontoloana eo amin’ny haino aman-jery, ny kolontsaina zary lasa manimba ny taranaka. Ekena ny fisokafana amin’ny Firenena efa mandroso na Tatsinanana na Tandrefana fa tsy ho fahafahana malalaka mitondra ho amin’ny fanimbana no atao. Manaiky ny fivelaran’ireo Firenena Afrikana, niady ny tolona ho amin’ny demokratika sy ny fanoherana ireo mbola saribakolin’Imperialista teo amin’ny taniny ka namongorany an’izany tanteraka , ka tsy hay ho andinoin’ny tantara. Efa nitranga izany teo Madagasikara tamin’ny taona  1972.
Nivalombalona tao ny ora sy ny minitra ka nanjary  taona maro nifandimby. Nifanohitra tamin’ny 51 taona teo alohany ilay 10 taona taty aoriana satria niadana ny vahoaka noho ny fananany mpitondra hendry nahay naka lesona. Foana tanteraka ny fitiavan-tena fa nifandrombonana avokoa izay rehetra natao ka tafarina vetivety ny Firenena.Tsy nisy na dia iray aza filohan’antoko niolonolona fa niasa ho an’ny tanindrazana fa tsy ho an’ny antoko.Niverina ilay soatoavina efa rava fahiny dia ny Fihavanana sy ny Firaisankina, Hita taratra indray ny fifampitokisan’ny mpitondra fanjakana sy ny vahoaka entina.
Nony maraina indray….to ny faniriako.Feno vahoaka eran’ny tanàna.Trano mijoalajoala no nameno sy nisolo ilay trano tsizarizary. Migodana ny làlana sady tsara tarehy ery.Mifanaretsaka ny fiarakodia ary zary lasa niara - nonina ireo mpifahavalo nifandramaka fahiny.Tanora no maro amin’ireo vahoaka sambatra ireo ary ankizy sakany ny antsasa-manila amin’izany. Sambatra izy noho ny nofiko tiako ho tanterahana ary tsy hijanona ho nofy ihany satria mino aho fa hisy hamaky izao tantarako izao.


TAPITRA

- 6 -