Avereno ny an'i Kaisara&Andriamanitra (Elysé Azrael)

"Aloavy ho an'i Kaisara izay an'i Kaisara, ary ho an'Andriamanitra izay an'Andriamanitra" (Mat 22:21): io no valin-tenin'i Jesosy rehefa nanontaniana izy, raha mety na tsia ny mandoa vola HETRA ho an'ny Kaisara. NEKEN'I JESOSY araka izany ny fandoavan-ketra, ary mbola nolazainy aza fa mbola misy hetra mila aloa ho an'Andriamanitra koa!
Ny teny hoe "aloavy" dia nadika avy amin'ny teny grika hoe APODOTE izay midika ara-bakiteny hoe AVERENO (en français: RENDEZ à César ce qui est à César, et à Dieu ce qui est à Dieu).
Izany hoe NANOME NA NAMPINDRANA ZAVATRA ALOHA ANDRIAMANITRA SY NY FANJAKANA, KA MILA MAMERINA ISIKA, ary izany no antony andoavantsika hetra.
Inona ohatra no zavatra omen'ny fanjakana antsika? Ny fampandrosoana, ny asa fanasoavam-bahoaka toy ny fitandroana filaminana sy fandriam-pahalemana ary ny fitsaboana, sns. Vola hetra avy amintsika avokoa no ahafahany miasa, ka "ny antsika ihany no anajany antsika". Noho izany dia rariny loatra, ary ADIDY MASINA SY ANDRAIKITSIKA TOKOA ny fandoavan-ketra.