Ilay voronkely be rehareha (Hasinala)

Tamin’ny voalohany, dia tena mora tamin’ity voronkely ny dia. Nitsoka ny rivotra, namirapiratra ny masoandro, ary hitany teny lavitra teny ireo tendrombohitra fito.
Nihira izy sady nanidina.
— Ho ahy ny fandresena! Ho ahy ny voninahitra!
Rehefa afaka ora vitsivitsy anefa, dia niova ny toetr’andro. Nisy rahona mainty nanarona ny lanitra. Nanomboka nifofofofo ny rivotra, ary nilatsaka ny orana.
Niezaka nanidina mafy kokoa i voronkely Hanitriniala, saingy natosiky ny rivotra niverina izy. Nisy tselatra nazava be, ary kotroka mafy  nanakoako nanerana ny lohasaha.
Natahotra izy.
— Aiza aho izao? hoy izy anakampo.
Tsy hitany intsony ny tendrombohitra. Tsy hitany koa ny lalana hiverenana. Lena ny elany, ary reraka izy.
Niezaka nitady toerana hialofana izy, saingy tsy nisy hazo teo amin’ilay toerana nisy azy. Farany, dia nahita vatolampy lehibe izy ka nipetraka teo ambaniny.
Nangovitra ilay voronkely. Sambany teo amin’ny fiainany izy no nahatsapa fa tsy ampy akory ny fahaizana manidina.
Tao anatin’ny haizina, dia nandre feo kely izy.
— Misy olona ve ato?
Gaga izy, satria fantany ilay feo.
— Iza izany?
— Izaho ity, ry Hanitriniala. I Vitsika.
Niondrika ilay voronkely ka nahita an’i Vitsika, izay nitady toerana maina hialofana teo anelanelan’ny vato.
— Ahoana no nahatongavanao teto? hoy i Hanitriniala. Ianao nefa tsy afaka manidina akory!
— Marina izany, hoy i Vitsika. Fa nisy lalana kely teo amoron’ny hantsana, ary nanaraka azy aho. Tsy haiko ny lalana manontolo, fa nandeha tsikelikely aho sady nitandrina.
Nangina i Hanitriniala.
Rehefa afaka kelikely, dia hoy izy:
— Azafady ry Vitsika. Naneso anao aho satria tsy afaka manidina ianao. Ankehitriny anefa izaho ity no very lalana, ary ianao indray no tonga eto amiko.
Nitsiky i Vitsika.
— Tsy maninona izany, ry namako. Tsy tokony hifaly amin’ny fahorian’ny hafa isika. Fa tadidio fa samy manana ny heriny sy ny fahalemeny ny tsirairay.
Nandritra ny alina, dia niara-nialoka izy roa. Nizara ny voa kely nentiny tamin'i Hanitriniala i Vitsika, ary ity voronkely kosa an'i Vitsika hitady toerana maina kokoa.
Sambany izy no nahatsapa ny hafaliana ateraky ny fifanampiana, na dia tsy nisy olona nidera azy aza.